ست البيت للشاعر السوداني محجوب شريف

 

إهداء خاص إلى كل النساء الكادحات في بلادي:

صباح الخير.. مساء النور..
يا ست البيت.. و ست المكتب..
الفاتح على الجمهور..
ختم الدوله جنبك هيبه..
قط لم تقبلي المصرور..
حلال وبلال عليك يا أم
مرتب بالتعب ممهور..
وساعه رضاعه..
أجمل من سياحه شهور..
النوم النوم نوم وتعال
النوم تعال.. سكت الجهال..
آخر من تنومى..
وتقومي دغشا بدرى..
قبل الشمس ما تترك سرير النوم..
ويغادر عشته العصفور..
تحرسيها اللبينه تفور..
تسوي الشاهي..
يا إلهي يا إلهي..
كم من سندوتش فطور..
للممتحنه.. والبهاتي..
جاري يحصل الطابور..
وبرضو وراك مستنيك..
هم دفتر غياب وحضور..
لفحنا العمه وخليناك..
بين الحلة.. والماسوره..
رتبتي القميص والطرحه..
حفظتي النشيد والسوره..
والتعب البخلي الصوره..
فى عينيك أجمل صوره..
ديك الحجله.. وداك البلي..
ياما تشري.. ياما تبلي..
ما بتكلي.. ما بتملي..
ما بنقص حنانك ملي..
هل هذا عمل مأجور..؟!
ممرضه سستره ودكتوره..
توب السهره أبيض..
ناصع بين العنابر نور..
مدرّسة حيث مدرستك
حنانك سور..
كراريس الصبا الباكر..
تذاكر نحو بكره مرور..
سلاما عمتي الفراشه..
المقشاشه جنبك..
كم بشوفها زهور..
بت الشده والورديه..
والمكنه التي ليلها ونهارها تدور..
تحت الشمس فى الحواشه..
بين الحبه والزرزور..
كليك كليك يا حلوه..
جمبك الكمبيوتر تكيه
صبح الشاشه ياخد من عيونك نور..
أم الكادحين وغلابه والعزابه..
ست الكسره..
أحب القرقريبه
القرقريبه.. القرقريبه قريبه..
فى إيدك فراشه تدور..
والهبابه والعرق البنقط داك..
زى قمريه تقوقي فوق السور..
تغازل فى الضحى النقاع..
عشه.. وميري..
مدرسة الحياه المعموره..
لا كراس.. ولا سبوره..
لا تقرير سمح رقاكي.. لا دبوره..
تحيي تعيشي لا مقهوره.. لا منهوره..
لا خاطر جناك مكسور..
بل مستوره..
يا ذات الضرا المستور..
سلاما يا غزالات العمل.. والبيت..
ملاياتك ضفاف النيل..
أحب واديك.. هذا الحوش..
أحب الشاي مع القرقوش..
احب المستك الفواح..
أهيم فى غمرة النعناع..
بن.. ومدق..
وجمره تسخن الإيقاع..
سلاما يا نساء الأرض قاطبة..
في كل مكان..