قصيدة "عويناتك" للشاعر السوداني الدكتور مبارك بشير

أقول ليها عويناتك

ترع لولي وبحار ياقوتْ...
مناحات ريد حزاينيه

بغازل فيها مأساتي...

وفي شرف العبور ليها

بموت وأكسر شراعاتي...
تقول لي غناك حزين

غناي حزين...
وأنا الواهب قصائدي الباكيه للفرحهْ...
وأنا البديها شان ريدي وصباي طرحهْ...
قول ليها عويناتك زي سواد قدري...
مكحله عمري من بدري...
لو بقدر أسافر في بريق لحظك وما أرجعْ...
تقول لي خايفاك تتوجع وأتوجعْ...
أقول ليها عويناتك ديار وعدي...
مسوره بي جدار صمتكْ...
عذابي معاك بريدك قبل ما أعرفكْ...
ولو بقدر أشيل من الزمن وقتي
بموت في لحظه وأوهب ليك عقاب عمري
حروف اسمِكْ...
جمال الفالْ...
وراحة البالْ...
وهجعة زول بعد ترحالْ...
وتنية حلوة للشبَّالْ...
ودنيتنا ومشاويرنا..
وغنواتنا اللي ما بتنقالْ...
حروف اسمِك
نجوم ركّت على الياسمينْ...
فرح فى عين جمالها حزينْ...
أساور فى إيدين طفلهْ...
بتحفظ فى كتاب الدينْ...
زفاف عاشقين بعد فرقهْ...
وسط باقات دُعَا الطيبينْ...
حروف اسمِك
عقد منضوم بخيط النورْ...
وطلة ورده من السورْ...
ونغمه تنادي من طمبورْ...
وشُعلة فرحة فى الوادي...
تَشِع جَذلانه ليها شهورْ...
حروف اسمك
وَكِت أشتاق وأرحل ليك...
وأسرح فى عسل عينيكْ...
بِتَحضنِّىي...
قَبُل ألمسَ حرير إيديكْ...
تأرجِحني...

وتَفرحني...

وتخليني أدق صدري...
وأقيف وسط البلد واهتف
بريدك يا صَباح عمري...