(مين) الزيك؟! - من أشعاري بالعامية السودانية

(مين) الزيك؟!..

و(مين) الحظه بيشبه حظك؟!..

لما تكون إنسان محظوظ..

وتبقى دوام في الريد متهني..

وتبقى حياتك زي ما عايز..

وزي ما إنت دوام متمني..

وتبقى حكاوي الريده الحلوه..

معاك بتغني..

وفجأه طموحك يبقى حقيقه 

وكل الدرتو وليو مستني..

و(مين) الزيك يا محظوظ؟!..

*****

وعشت تفتش عن إنسانه 

شعارها الأول اسمه سماحه..

وكل أفعالها 

جمال وفلاحه..

وجيت ولقيتها

حديثها ملاحه..

وجيت ولقيتها بتعرف كيف 

تديك الراحه..

وجد بتحس بنبض إحساسها..

في كل أفعالها..

وكل أقوالها..

وكل أفراحها..

وكل أتراحها..

و(مين) الزيك يا محظوظ؟!..

*****

ودرت هداوة بالك تملا..

مساحة عمرك وتغمر ذاتك..

ودرت الفرحه تعمر بيتك..

وما تستفرد بيك أناتك..

وجيت ولقيت الدايرو معاها..

وفرهد غصنك بي ضحكاتك..

أكيد راح تعرف إنه هواها..

بيملا عليك بالفرحه حياتك..

و(مين) الزيك يا محظوظ؟!..

*****

ودرت أميره تنور بيتك..

وترفع قدرك بأفعالها 

وما تستصغر يوم من صيتك..

تكرم ضيف الهجعه معاكا 

وتبقى وصيه عليك في شيتك..

وجيت ولقيت الأنثى الحلوه 

الواقفه معاك بكل إحساسها..

وممكن تخسر شانك روحها

وما بتستكتر فيك أنفاسها..

وجد ما بتقبل شينه تصيبك 

أو تتحمل أذى من ناسها..

و(مين) الزيك يا محظوظ؟!..

*****

وكت بتفتش عن إنسانه 

بتحفظ سرك لما تغيب..

وتفرح جدا بي طلاتها

وبي بسماتها 

وإنت قريب..

وما بتتوقع يوم تطراكا 

بكلمه بذيئه وموقف عيب..

دي الإنسانه الهسي لقيتها 

بتزرع دربك 

حسن وطيب..

و(مين) الزيك يا محظوظ؟!..

*****

و(مين) الزيك؟!.. 

وانت الواقف حارس بابها..

وما هماك في دربك ليها 

هجير الدنيا ونار أتعابها..

وشان ما هي توافق بيك 

خسرت كتير 

وضقت صعابها..

وكان الكل في كفه أمامك 

وانت اخترت نبيل أنسابها..

ويوم ما صارت ملكك وحدك 

ما صدقت 

وقت بحيابها..

وهي العرفت قيمتك وقدرك 

ورفعت راسك بين أحبابها..

و(مين) الزيك يا محظوظ؟!...

*****

و(مين) الزيك؟!

طوع حرفه 

عشان يتغزل في ملكاتها..

ولو في يوم الناس تستفسر 

تلقى جوابها جميل آياتها..

وتبقى الحلوه براها الأولى 

ف كل حركاتها وكل سكناتها..

وتبقى فريده..

ودره خريده..

وأبدا مافي شبيه لي ذاتها..

وكان فتشت جميع أخواتها..

ما بتلقالها شبيه لي ذاتها 

و(مين) الزيك يا محظوظ؟!..

*****