يا حليلها (زينب) أمنا
الكان هواها بلمنا
والكان جناحها بضمنا
والكان حديثها بسرنا
والكان حنانها بهزنا
والكان دعاها بهمنا
ويمسح دموعنا وهمنا
*** *** *** ***
السمحه ما بتلقالها زي
مليانه حب مليانه ضي
إحساسها كان باقيلنا في
والريده تغمر كل حي
*** *** *** ***
أمي ملكة وبت ملوك
لا ريبه فيها ولا شكوك
إن جيت ديارهم بكرموك
وإن فت غادي بيحشموك
*** *** *** ***
رباها جدها (ود فزع)
الكان مشبع بالورع
والياما علمه الناس نفع
في (الخلوة) زينة المجتمع
*** *** *** ***
ربتنا بي إحساس فريد
وسقتنا من موية (المسيد)
ما بتعرف الطبع العنيد
وكستنا توب العز جديد
*** *** *** ***
أمي كانت ملكة جد
ما بتعرف الهم والنكد
متفاءله ديما تدينا ود
ومهما طال هم السنين،
بتزيد جلد
*** *** *** ***
أمي كانت مفخره
والله قطعة سكره
كل العقول متحيره
في السمحه ست المقدره
*** *** *** ***
الريده تنبع منها
والنيل بيشرب حنها
والقمري عاشق فنها
واللولي بحسد سنها
*** *** *** ***
أمي نخله وتوب عفاف
أمي ما بتعرف خلاف
متسامحه زي شمس الصباح
بنورها تغرق في الضفاف
*** *** *** ***
أمي فعلا مدرسه
بالريده ديما مؤسسه
لا كبر لا إحساس غرور
ما فيها حس للغطرسه
*** *** *** ***
أمي أم (ست النفر)
ست البدو وست الحضر
أم (البشير) أم الفقير
و(بثينه) فيها الحب حضر
*** *** *** ***
أمي ربت لي جناي
قالت له إنت حبيب قساي
وبكره تكبر يا عشاي
أمي أجمل حب وريد
أمي رفعت مستواي
*** *** *** ***
أمي للضيفان عشا
أمي للعريان كسا
أمي للمظلوم ملاذ
أمي للعيان شفا
أمي بلسم للأسى
*** *** *** ***
أنا مهما قلت من الكلام
ببقى عاجزه عن احترام
الشامخة زي عز الجدود
العالية زي طبع الغمام
*** *** *** ***
أنا قدر أحاول أوصفها
في معجم العز والمعرفه
لكن محال أقدر أكون
بالوصف قطعا منصفه
أمي تاج الأمهات
ولكل أمومه مشرفه
*** *** *** ***
أمي (زينب) أغلى أم
أمي زي نور الحرم
ولسواها الريد علي حرم
أنا بتها المكتوله شوق
أنا (نايله) بت أم الأمم
*** *** *** ***
ليست هناك تعليقات:
إرسال تعليق